PM says the golden era of India’s start-ups is starting now, 16th January to be celebrated as National Start-Ups Day.
देशाच्या भरभराटासाठी भारतीय स्टार्ट अप कंपन्यांचं योगदान महत्त्वपूर्ण असेल – प्रधानमंत्री.
नवी दिल्ली : भारतीय स्वातंत्र्याला १०० वर्ष पूर्ण होतील त्यावेळी देशाच्या भरभराटासाठी भारतीय स्टार्ट अप कंपन्यांचं योगदान महत्त्वपूर्ण असेल, असं प्रधानमंत्री नरेंद्र मोदी यांनी म्हटलं आहे.
प्रधानमंत्र्यांनी आज भारतीय स्टार्टअप कंपन्यांबरोबर दूरदृष्य प्रणालीच्या माध्यमातून संवाद साधला त्यावेळी ते बोलत होते. चालू वर्ष भारतीय स्टार्टअप कंपन्यांसाठी महत्त्वपूर्ण असणार आहे, असंही प्रधानमंत्री म्हणाले.
कृषी, आरोग्य, अवकाश, उद्योग, सुरक्षा, वित्त तंत्रज्ञान आणि पर्यावरण अशा विविध क्षेत्रातल्या स्टार्टअप कंपन्या या संवादात सहभागी झाल्या होत्या. दीडशेहून अधिक कंपन्यांची सहा कार्यकारी गटांमध्ये विभागणी करण्यात आली असून, प्रत्येक गटानं प्रधानामंत्र्यांसमोर सादरीकरण केलं. दरवर्षी १६ जानेवारीला स्टार्टअप दिवस साजरा केला जातो.
या दशकाला नावीन्य आणि कल्पनांचे एक नवीन युग असल्याचे सांगून श्री मोदी म्हणाले, ग्रामीण अर्थव्यवस्थेपासून ते उद्योग 4.0 पर्यंत, आमच्या गरजा आणि आमची क्षमता अमर्याद आहे. भविष्यातील तंत्रज्ञानाच्या संशोधन आणि विकासासाठी गुंतवणूक करणे हे सरकारचे प्राधान्य असल्याचे ते म्हणाले.
ते म्हणाले, लहानपणापासूनच तरुणांच्या मनात नवोपक्रमाची आवड निर्माण व्हावी, यासाठी संस्थात्मक स्वरूपाचा आमचा प्रयत्न आहे. ते म्हणाले, नऊ हजारांहून अधिक अटल टिंकरिंग लॅब मुलांना शाळेत नवनवीन शोध घेण्याची आणि नवीन कल्पनांवर काम करण्याची अनोखी संधी देत आहेत.
चला भारतासाठी इनोव्हेट करूया आणि भारतातून नवनिर्मिती करूया हा मंत्र देत पंतप्रधान म्हणाले, भारतातील स्टार्टअप्स जगातील इतर देशांपर्यंत सहज पोहोचू शकतात. नवोन्मेषी तरुण स्टार्ट अप्सच्या जगात भारताचा झेंडा रोवत आहेत, असे सांगून त्यांनी देशातील सर्व स्टार्ट अपचे अभिनंदन केले. ते म्हणाले की, भारताने ग्लोबल इनोव्हेशन रँकिंगमध्ये 46 व्या क्रमांकावर पोहोचून आपली क्रमवारी सुधारली आहे. ते म्हणाले, गेल्या वर्षभरात देशात 42 युनिकॉर्न उदयास आले आहेत आणि भारत झपाट्याने युनिकॉर्नच्या शतकाकडे वाटचाल करत आहे. ते म्हणाले, हजारो कोटी रुपयांच्या या कंपन्या स्वावलंबी आणि आत्मविश्वासपूर्ण भारताचे वैशिष्ट्य आहेत. ते म्हणाले की, स्टार्टअप्सने लाखो तरुणांना रोजगार दिला आहे आणि अनेक स्टार्टअप टियर 2 आणि 3 शहरांमधून उदयास येत आहेत.
पंतप्रधान म्हणाले की, सरकारने आयपीआर नोंदणीशी संबंधित नियम सोपे केले आहेत. ते म्हणाले, गेल्या वर्षी १६ हजार कॉपीराईट मंजूर झाले होते, जे २०१३-१४ मध्ये चार हजार होते. ते म्हणाले, गेल्या वर्षी 28 हजारांहून अधिक पेटंट मंजूर झाले आहेत, जे 2013-14 मध्ये चार हजार होते. ते म्हणाले, गेल्या वर्षभरात 2.5 लाखांहून अधिक ट्रेडमार्कची नोंदणी झाली आहे.
