NCP will contest Assembly elections in three states.
राष्ट्रवादी काँग्रेस निवडणूक तीन राज्यांमध्ये विधानसभा निवडणूक लढवणार.
मुंबई: देशातल्या पाच राज्यांमध्ये विधानसभा निवडणूका जाहीर झाल्या असून यापैकी तीन राज्यांमध्ये राष्ट्रवादी काँग्रेस निवडणूक लढवणार असल्याचं पक्षाध्यक्ष शरद पवार यांनी म्हटलं आहे. ते आज मुंबईत वार्ताहर परिषदेत बोलत होते.
मणिपूर, गोवा आणि उत्तरप्रदेश या राज्यांचा यात समावेश असून या तिन्ही राज्यांतली निवडणूक आपला पक्ष काँग्रेस, तृणमूल काँग्रेस आणि अन्य लहान-मोठ्या पक्षांबरोबर आघाडीनं लढणार असल्याचं त्यांनी स्पष्ट केलं. मणीपूरमध्ये राष्ट्रवादीचे चार आमदार आहेत.
त्यामुळे यावेळी राष्ट्रवादी ५ जागा लढणार आहे, गोव्यामध्ये कॉंग्रेस,तृणमूल आणि अन्य पक्षांबरोबर चर्चा सुरू आहे. तर उत्तरप्रदेशमध्ये आपण पुढल्या आठवड्यात स्वतः जाणार असल्याचं ते म्हणाले.
उत्तरप्रदेशमध्ये राष्ट्रवादी काँग्रेस, समाजवादी पक्ष आणि इतर छोट्या – मोठ्या पक्षांची आघाडी झाली आहे. उद्या लखनऊमध्ये या सर्व पक्षांची बैठक होणार असून त्या बैठकीत जागा वाटपाची घोषणा केली जाईल असं पवार म्हणाले.
