भारत आणि बांग्लादेश दरम्यान विविध क्षेत्रात ७ द्विपक्षीय करार

7 bilateral agreements between India and Bangladesh in various fields

भारत आणि बांग्लादेश दरम्यान विविध क्षेत्रात ७ द्विपक्षीय करार

नवी दिल्ली: पंतप्रधान नरेंद्र मोदी आणि बांगलादेशच्या पंतप्रधान शेख हसीना यांनी आज नवी दिल्लीत द्विपक्षीय चर्चा केली आणि भारत-बांग्लादेश यांच्यातील सर्वसमावेशक भागीदारीचा आढावा घेतला.

भारत-बांगलादेश शिष्टमंडळ स्तरावरील चर्चेचे नेतृत्व दोन्ही नेत्यांनी केले. कनेक्टिव्हिटी, ऊर्जा, जलस्रोत, व्यापार आणि गुंतवणूक, सीमा व्यवस्थापन आणि सुरक्षा, विकास भागीदारी आणि प्रादेशिक आणि बहुपक्षीय विषयांशी संबंधित मुद्दे अजेंड्यावर होते.

प्रधानमंत्री नरेंद्र मोदी आणि बांगलादेशाच्या प्रधानमंत्री शेख हसीना यांनी ‘मैत्री सुपर-औष्णिक ऊर्जा प्रकल्पाच्या पहिल्या संघाचं आज संयुक्तरित्या उद्घाटन केलं. या प्रकल्पाच्या उभारणीसाठी भारतानं सवलतीच्या दरात अर्थसहाय्य केलं असून त्यामुळे बांगलादेशाच्या राष्ट्रीय ग्रीडमध्ये १ हजार ३२० मेगावॅट ऊर्जेची भर पडणार आहे.

चर्चेनंतर जलसंपदा, रेल्वे, विज्ञान आणि तंत्रज्ञान आणि अंतराळ तंत्रज्ञान यासह सात सामंजस्य करारांची देवाणघेवाण झाली. यामध्ये प्रसार भारती आणि बांगलादेश टेलिव्हिजन यांच्यात प्रसारण क्षेत्रात सहकार्याबाबत सामंजस्य कराराचा समावेश आहे. आज सकाळी सुश्री हसिना यांचे राष्ट्रपती भवनात औपचारिक स्वागत करण्यात आले. काल त्या चार दिवसांच्या भारत दौऱ्यावर आल्या होत्या.

यावेळी प्रसारमाध्यमांशी बोलताना बांगलादेशाच्या पंतप्रधान म्हणाल्या की भारत हा मित्र आहे आणि भारताने आपल्या देशाच्या मुक्तिसंग्रामात दिलेल्या योगदानाची आठवण करून दिली. आजची चर्चा फलदायी ठरेल अशी आशा त्यांनी व्यक्त केली आणि मुख्य उद्देश आर्थिकदृष्ट्या विकसित करणे आणि लोकांच्या मूलभूत गरजा पूर्ण करणे हे आहे. सुश्री हसिना यांनी राजघाटावर महात्मा गांधींना आदरांजली वाहिली.

बांगलादेशाच्या पंतप्रधान आज संध्याकाळी राष्ट्रपती द्रौपदी मुर्मू आणि उपराष्ट्रपती जगदीप धनकर यांची भेट घेणार आहेत. परराष्ट्र मंत्री डॉ. एस. जयशंकर यांनी काल बांगलादेश शिष्टमंडळातील मान्यवरांची भेट घेतली.

बांगलादेश आणि भारत यांच्यात चार हजार किलोमीटर लांबीच्या आंतरराष्ट्रीय सीमा आहेत. आसाम, मेघालय, मिझोराम, त्रिपुरा आणि पश्चिम बंगाल ही पाच राज्ये बांगलादेशच्या सीमेवर आहेत. 2015 मध्ये जमीन सीमा कराराच्या ऐतिहासिक प्रोटोकॉलला मान्यता देऊन दोन्ही बाजूंमधील जमिनीची सीमा सौहार्दपूर्णपणे सोडवली गेली आहे.

भारतात येणाऱ्या परदेशी पर्यटकांमध्ये बांगलादेशचा वाटा सर्वात मोठा आहे. 2021-22 मध्ये, बांगलादेश हा भारतासाठी दक्षिण आशियातील सर्वात मोठा व्यापार भागीदार आणि भारतासाठी 4थ्या क्रमांकाचा निर्यात गंतव्य म्हणून उदयास आला आहे. गेल्या पाच वर्षांत, द्विपक्षीय व्यापार 9 अब्ज वरून 18 अब्ज डॉलर्स इतका वाढला आहे.

हडपसर न्यूज ब्युरो
hadapsarinfomedia@gmail.com