गुजरातमध्ये भाजपा, तर हिमाचल प्रदेशात काँग्रेस विजयी

In the assembly elections, BJP won in Gujarat, Congress won in Himachal Pradesh

विधानसभा निवडणुकीत गुजरातमध्ये भाजपा, तर हिमाचल प्रदेशात काँग्रेस विजयी

नवी दिल्ली : गुजरात आणि हिमाचल प्रदेश विधानसभा निवडणुकांचं चित्र स्पष्ट झालं आहे. एकूण 182 जागांपैकी भाजपा 152 जागांवर विजयी झाला आहे. काँग्रेसचा 16 जागांवर विजय झाला आहे. आपचा 5 जागांवर विजय झाला आहे.  हिमाचल प्रदेशमध्ये एकूण 68 जागांपैकी भाजपाला 25 जागांवर विजय मिळाला आहे. काँग्रेसला 40 जागांवर विजय मिळाला आहे.

गुजरात विधानसभा निवडणुकीच्या विजयाबद्दल प्रधानमंत्री नरेंद्र मोदी यांनी आभार मानले

गुजरात विधानसभा निवडणुकीच्या विजयाबद्दल प्रधानमंत्री नरेंद्र मोदी यांनी गुजरातच्या जनतेचे आभार मानले आहेत. लोकांनी विकासाच्या राजकरणाला पाठिंबा देतानाच, विकास चांगल्या गतीनं कायम राहावा, अशी इच्छाही व्यक्त केली आहे, असं मोदी यांनी म्हटलं आहे. पक्षाचा प्रत्येक कार्यकर्ता हेच पक्षाचं खरं सामर्थ्य आहे, त्यांच्या कठोर मेहनतीशिवाय हा ऐतिहासिक विजय शक्य नव्हता, असं त्यांनी म्हटलं आहे.

मुख्यमंत्री भूपेंद्र पटेल आणि हर्ष संघवी, कनुभाई देसाई, मनीषा बेन वकील आणि रुषिकेश पटेल यांच्यासह त्यांच्या अनेक मंत्र्यांसह भाजपचे सर्व प्रमुख चेहरे, पक्षाचे युवा नेते अल्पेश ठाकोर आणि हार्दिक पटेल यांनी त्यांच्या जागांवर विजय मिळवला आहे. काँग्रेसकडून शैलेश परमार, अर्जुन मोरवधिया आणि इम्रान खेडावाला हे त्यांच्या मतदारसंघातून विजयी झाले आहेत.

काँग्रेसचे ज्येष्ठ नेते परेश धनानी आणि विरोधी पक्षनेते सुखराम रथवा यांचा पराभव झाला आहे. AAP चे मुख्यमंत्री पदाचे उमेदवार इशुदान गढवी यांचा खंबालिया जागेवर भाजपच्या अयार मुलुभाई हरदासभाई बेरा यांच्याकडून 18745 मतांच्या फरकाने पराभव झाला.

हिमाचल प्रदेशातल्या निकालावर प्रधानमंत्र्यांनी जनतेचे आभार मानले

हिमाचल प्रदेशातल्या निकालावरही प्रधानमंत्र्यांनी तिथल्या जनतेचे आभार मानले आहेत. राज्याच्या आकांक्षा पूर्ण करण्यासाठीचं काम चालूच राहील आणि येणाऱ्या काळात भाजपा जनतेच्या प्रश्नांवर आवाज उठवत राहील, असंही त्यांनी म्हटलं आहे.

हिमाचल प्रदेशमध्ये, काँग्रेसमधील प्रमुख उमेदवार ज्यांनी आज विजय नोंदवला, त्यात हरोली विधानसभा मतदारसंघातून मुकेश अग्निहोत्री, नादौनमधून सुखविंदर सिंग आणि शिमला ग्रामीण मतदारसंघातून विक्रमादित्य सिंग यांचा समावेश आहे. किन्नौर मतदारसंघातून काँग्रेसचे उमेदवार जगतसिंग नेगी विजयी झाले, त्यांनी त्यांचे जवळचे भाजप प्रतिस्पर्धी सूरत नेगी यांचा सहा हजार नऊशे मतांच्या फरकाने पराभव केला.

भाजप नेते आणि मुख्यमंत्री जयराम ठाकूर यांनी सेराज मतदारसंघातून विजय मिळवला असून, त्यांनी त्यांचे निकटचे प्रतिस्पर्धी काँग्रेसचे चेत राम यांचा ३८ हजार मतांच्या फरकाने पराभव केला आहे. विधानसभा निवडणुकीत पराभव स्वीकारत त्यांनी राज्यपालांकडे राजीनामा सुपूर्द केला. येणारे सरकार जनतेला दिलेली सर्व आश्वासने पूर्ण करेल, असा विश्वास त्यांनी व्यक्त केला.

सुंदरनगर मतदारसंघातून भाजपचे उमेदवार राकेश कुमार विजयी झाले आहेत. त्यांनी त्यांचे जवळचे प्रतिस्पर्धी काँग्रेसचे सोहन लाल यांचा आठ हजारांहून अधिक मतांनी पराभव केला.

भाजपच्या अनिल शर्मा यांनी मंडीची जागा कायम राखली असून त्यांनी काँग्रेसच्या चंपा ठाकूर यांचा दहा हजारांहून अधिक मतांनी पराभव केला आहे. नूरपूर विधानसभा मतदारसंघात भाजपचे रणवीर सिंग यांनी काँग्रेसचे अजय महाजन यांचा अठरा हजार ७०० मतांच्या फरकाने पराभव केला.

हडपसर न्यूज ब्युरो
hadapsarinfomedia@gmail.com