Women’s T20 Asia Cup Final: India win against Sri Lanka by 8 wickets
महिला T20 आशिया कप फायनल: भारताचा श्रीलंकेवर 8 गडी राखून विजय
रेणुका सिंगची धारदार गोलंदाजी, स्मृती मंधानाच्या 25 चेंडूत नाबाद 51 धावा
बांगलादेश : बांगलादेशच्या सिल्हेट आंतरराष्ट्रीय क्रिकेट स्टेडियमवर झालेल्या अंतिम सामन्यात भारताने श्रीलंकेचा 8 गडी राखून पराभव करून महिला आशिया कप 2022 जिंकला आहे.
भारताने जेतेपदाच्या लढतीत श्रीलंकेचा 8 गडी राखून पराभव करून आपला 7वा आशिया कप जिंकला आहे. हरमनप्रीत कौरच्या नेतृत्वाखाली भारतीय संघाने प्रथमच आशिया कप जिंकला आहे.
नाणेफेक जिंकून फलंदाजीचा निर्णय घेतलेल्या श्रीलंकेला 20 षटकांत 9 गडी गमावून 65 धावाच करता आल्या. सामन्यात श्रीलंकेने नाणेफेक जिंकून फलंदाजीचा निर्णय घेतला पण निर्णय त्यांच्या बाजूने गेला नाही.
रेणुका सिंगची धारदार गोलंदाजी
तिसऱ्या षटकात कर्णधार आणि सलामीवीर चमारी अटापट्टू (06) धावबाद झाल्यानंतर श्रीलंकेच्या संघाचा डाव कोलमडला. रेणुका सिंगने (5/3) पुढच्याच षटकात हर्षिता मडावी आणि हसिनी परेरा यांना बाद केले तर अनुष्का संजीवनी धावबाद झाली. यानंतर रेणुकाने सहाव्या षटकात कविशा दिलहरीला 16 धावांत पॅव्हेलियनमध्ये पाठवले.
राजेश्वरी गायकवाड (16/2) हिने निलाक्षी डी सिल्वा आणि ओशादी रणसिंगचे बळी घेतले तर स्नेह राणा (13/2) ने मलशा शेहानी आणि सुगंधा कुमारीला बाद केले.
43 धावांवर श्रीलंकेच्या नऊ विकेट पडल्यानंतर शेवटच्या दोन फलंदाजांनी 27 चेंडूत 22 धावांची चतुराई भागीदारी करत संघाला 20 षटकांत 65/9 पर्यंत नेले. इनोका रणवीराने 22 चेंडूंत दोन चौकारांसह नाबाद 18 धावा केल्या, तर 11व्या क्रमांकाचा फलंदाज अचीनी कुलसूर्याने 13 चेंडूंत सहा धावा जोडल्या.
स्मृती मंधानाच्या 25 चेंडूत नाबाद 51 धावा
आशिया चषक फायनलमध्ये भारतीय महिलांनी पाचव्यांदा लंकेचा पराभव केला आहे. स्मृती मंधानाने 25 चेंडूत नाबाद 51 धावा करत अर्धशतक केल्याने हे आव्हान सोपे ठरले. तिने धडाकेबाज खेळी करत 25 चेंडूंत सहा चौकार आणि तीन षटकारांच्या मदतीने 51 धावांची नाबाद खेळी खेळली. कर्णधार हरमनप्रीत कौरनेही नाबाद 11 धावांचे योगदान देत भारताने69 चेंडू राखून सामना जिंकला.
भारताने गुरुवारी थायलंडवर आरामात विजय मिळवून अंतिम फेरीत प्रवेश केला, तर दुसऱ्या उपांत्य फेरीत श्रीलंकेने पाकिस्तानचा एका धावेने पराभव केला.
हडपसर न्यूज ब्युरो
hadapsarinfomedia@gmail.com
